2020/21-mi efterskolernerit pingajorarterutaat aallartipput

Ukioq atuarfiusoq 2020/21 nunarsuaq tamakkerlugu nappaassuarmit tuniluuttumit COVID-19-imit annertuumik sunnerneqarsimavoq. Ukiup atuarfiusup ingerlanerani Danmarkimi efterskolernerit aallartinneqartut 32 pct.-inik ikileriarsimapput, Kalaallillu Nunaanni aamma efterskolernerit 13 pct.-inik ikileriarsimallutik.

 

Efterskolernerit aallartinneqarsimasut ataatsimut katillugit 322-upput, 128-llu unitsinneqarput. Taamaasilluni ataatsimut naammassinnittarnermut procenti 60 pct.-imiilerpoq, ukiuni kingullerni 75 aamma 80 pct.-it akornanniissimangaluartoq.

 

Titartagaq 1. 2012/13-imiit 2020/21-mut efterskolernerit aallartinneqartut amerlassusaat, atuarfik malillugu

Najoqqutaq: Naatsorsueqqissaartarfik – Kisitsisaataasivimi kisitsisit takukkit (https://bank.stat.gl/UDNESF).

 

Efterskole Villads Villadsen-i atuartunut 80-inut inissaateqartoq Maniitsumi Efterskoli atuartunut 70-inut inissaateqarpoq. Atuartulli efterskolini aallartittut amerlassusaat inissaqartitsinermit amerlanerusinnaapput, unitsitsisoqartillugu atuartut nutaat aallartissinnaasarmata.

 

2020/21-mi Kalaallit Nunaanni efterskolernerit aallartinneqartut amerlassusaat ukiup siulianit aallartittunit ikinnerupput, tassani Efterskole Villads Villadsen-imi 59-it aallartissimallutik, Maniitsumi Efterskolimi 72-it aallartittut. 2020/21-mi qallunaat efterskoliini aallartittut ukiup siulianut sanilliullugit 90-inik ikileriarsimapput.

 

Efterskolernermik aallartitsisut amerlasuut inuusunnerusut

Amerlanerpaat ukiumi 16-inik ukioqalerfimminni efterskolernermik aallartitsisarput, amerlasuullu meeqqat atuarfianni naammasserlaajusarlutik. Ukiumi atuarfiusumi 2020/21-mi atualertut 75 pct.-ii ukiumi 16-iliiffimminni aallartissimasut 8 pct.-ii inuusunnerupput. Taamaallaat Danmarkimi inuusuttut 16-it inorlugit ukiullit efterskolernermik aallartitsisinnaapput.

 

16-inik ukioqalereersimallutik efterskolernermik aallartitsisartut amerlassusaat 2020/21-mi 18 pct.-iusimapput.

 

Titartagaq 2. 2012/13-imiit 2020/21-mut efterskolernerit aallartinneqartut, ukiut malillugit

Nalunaarut: Ukiup pineqartup naanerani atuartut ukiui malillugit naatsorsuisoqarpoq.

Najoqqutaq: Naatsorsueqqissaartarfik – Kisitsisaataasivimi kisitsisit takukkit (https://bank.stat.gl/UDNESE).

 

2020/21-mi efterskolernerit ikinnerusut unitsiinnarneqarput

Ukiumi atuarfiusumi 2020/21-mi atuartut 194-it efterskolernermik naammassinnissimapput, efterskolernerit aallartinneqarsimasut 60 pct.-iinik annertussusillit. Tamanna ukiup siulianut naleqqiullugu 9 pct.point-inik qaffariarneruvoq.

 

2020/21-mi Efterskole Villads Villadsen-imi naammassinnittarnermut procenti 76 pct.-iusimavoq, piffissamilu pineqartumi Maniitsumi Efterskoli-mi 54 pct.-iusimalluni.

 

Kalaallit Nunaanni efterskolinut sanilliullugit qallunaat efterskolii allannguuteqanngitsumik naammassinnittarnermut procenteqarput, 2020/21-mi 58 pct.-iulluni. Tamanna ukiup siulianitut annertussuseqarpoq, pisarnermisut 80 aamma 90 pct.-it akornanni annertussuseqartarluni.

 

Titartagaq 3. 2012/13-imiit 2020/21-mut naammassinnittarnermut procenti, efterskolit malillugit

Najoqqutaq: Naatsorsueqqissaartarfik – Kisitsisaataasivimi kisitsisit takukkit (https://bank.stat.gl/UDNESF).

 

Ukioqatigiinni pingasunit amerlanerulaartut efterskolernermik aallartitsisarput

Ataani takuneqarsinnaapput 1998-imiit 2004-rimut ukioqatigiiaat, ukiuni atuarfiusuni 2014/15-imi kiisalu 2020/21-mi efterskolernernik aallartitsisimasut naammassinnissimasullu.

 

Titartagaq 4. Ukioqatigiinni efterskolernermik aallartitsisimasut/naammassinnissimasut amerlassusaat, 1998-imiit 2004-rimut ukioqatigiit malillugit

Najoqqutaq: Naatsorsueqqissaartarfik – Kisitsisaataasivimi kisitsisit takukkit (https://bank.stat.gl/UDNESE).

 

Inuusuttut 2004-rimi inunngorsimasut pingajorarterutai efterskolernermik aallartitsisimapput, 21 pct.-iilu efterskolernermik naammassinnissimallutik. Ukioqatigiinni inuit amerlassusaat 1998-imi 849-miit 2004-rimi 778-inut ikileriarsimapput.